Avokatët e aktivistëve të Vetëvendosjes të cilët po gjykohen sot në Gjykatën Themelore të Prishtinën nën dyshimin se kanë kryer sulm ndaj Kuvendit të Kosovës, kanë kërkuar heqjen e masës së arrestit shtëpiak ndaj klientëve të tyre.

Tomë Gashi, avokat i të akuzuarit Frashër Krasniqi ka kërkuar që të hiqet kjo masë ndaj tyre dhe e njëjta të zëvendësohet me çfarëdo mase tjetër në bazë të kodit të procedurës penale, shkruan portali arbresh.info.

Edhe avokati i të akuzuarit tjetër, Atdhe Krasniqi, Ramiz Krasniqi ka thënë se klienti i tij është student i shkëlqyeshëm i dy fakulteteve në Universitetin e Prishtinës prandaj ka kërkuar që të hiqet masa e arrestit shtëpiak ndaj tij.

Emrush Kastrati, avokat i Egzon Halitaj tha se vazhdimi për masën e arrestit shtëpiak nuk ka pasur bazë ligjore.

Edhe Florije Dervinaj, avokate e të akuzuarës Adea Batusha kërkoi ndërprerjen e masës së arrestit shtëpiak me arsyetimin e njëjtë si avokatët e të akuzuarve të tjerë.

Dervinaj tha se klientja e saj është në prag të diplomimit në Universitet dhe ka nevojë të jetë e lirë për të punuar për temën e diplomës.

Ajo shtoi se aktivistët e VV-së e kanë kundërshtuar Demarkacionin dhe nëse ata vazhdojnë të mbahen në arrest shtëpiak për këtë çështje atëherë kjo është shkelje e rëndë e të drejtave të njeriut.

Avokatët kanë vlerësuar se aktivistët e kanë respektuar masën e arrestit shtëpiak në përpikëri./Arbresh.info.